اول ما تصحى من النوم بصى فى المراية هتلاقى !!
ولا بلاش انا اقولك هتلاقى ايه
هتشوفى خطوط وعلامات كتير على وشك اى نعم هتختفى بسرعة بس هاتسيب اثار صغيرة مش هتلاحظيها اوى بس هتكون بداية لخطوط التجاعيد المبكرة
وده سبب بعض العادات الخاطئة اللى انتى بتقومى بيها بعفوية وماتعرفيش مدى خطورتها فى ظهور التجاعيد اللى بتشوه جمال وشك فى سن صغير .
شيلى ايدك من على خدك
كتير منا وهو بيفكر ولا سرحان او حتى زعلان بيحط ايده على خده وده بيسبب خطوط من التجاعيد على الخد وأعلاه بجانب العين بعد فترة
افرديها ... طبعا التكشيرة
بلاش تكشرى لما تكونى غضبانة او مضايقة لان ده بيؤدى لظهور تجاعيد على الجبهه
اتبعى الاتيكيت فى الكلام
يعنى بلاش ترفعى حاجبك وانتى بتتكلمى او لما تكونى متنرفزة لان ده مش من الاتيكيت وشكلك بيبقى سيىء اوى وكمان بتؤدى لظهور تجاعيد مبكرة على الجبهة وده الأهم
حركى الجانبين ... مش وسطك ... لأ خدك
لما تاكلى ياريت ما تمضغيش الاكل على جنب واحد باستمرار لأن ده يؤدى لارتخاء عضلات هذا الجنب عن الجنب التانى وطبعا هايعمل لك تجاعيد مبكرة عليه
افردى ظهرك ... عشان رقبتك الجميلة
يعنى بلاش تقعدى وانتى مأتبة "رقبتك بين كتفك" لأن الوضع ده غير صحى ومؤلم وكمان بيسيب ترهلات لعضلات الرقبة وتجاعيد
ماتضحكيش اوى
مقصدش انك تعيطى بس خير الأمور الوسط لأن كتر الضحك يؤدى لظهور خطوط من التجاعيد على جانبى الفم
نامى على مخدة ناعمة
من الأفضل انك تنامى على مخدة ناعمة وبلاش تكون عليها رسومات بارزة أو عالية لانها ستترك فى وشك علامات وخطوط هاتشوفيها أول ما تصحى ، لما تبصى فى المرايا زى ما قولتلك فى الأول ورغم انها هتختفى بسرعة بس هتكون بداية لخطوط من التجاعيد على وجهك
اتمنى اكون اديتكوا معلومات مفيدة
المرأه و المجتمع
الأحد أغسطس 26, 2007 2:26 pm
